Янгиликлар
Янги таҳрирдаги Қонун лойиҳаси муҳокамаси
Сурхондарё вилоят адлия бошқармаси томонидан O’zLiDeP вилоят кенгаши билан ҳамкорликда Термиз шаҳридаги “Тадбиркорлар маркази”да Ўзбекистон Республикаси Олий Мажлиси Қонунчилик палатаси томонидан биринчи ўқишда қабул қилинган янги таҳрирдаги “Меҳнатни муҳофаза қилиш тўғрисида”ги қонун лойиҳаси муҳокамасига бағишланган тадбир ўтказилди.
Таъкидланганидек, мазкур қонун қабул қилингандан буён 22 йилдан зиёд вақт ўтди, ўтган давр мобайнида кенг қамровли ислоҳотлар натижасида меҳнатни муҳофаза қилиш ва меҳнат шароитларини яхшилаш, ходимлар соғлигини сақлашга қаратилган, шу жумладан, иш берувчининг фуқаролик жавобгарлигини кучайтиришни назарда тутувчи қатор қонунлар қабул қилинди, меҳнат муҳофазасига ёндашувлар ҳам ўзгарди.
Йиғилиш иштирокчилари қонун лойиҳасида кўзда тутилган янги нормалар халқаро принциплар ва стандартларга мувофиқ лозим даражадаги меҳнат шароитларини яратиш ва меҳнат хавфсизлигини таъминлаш, шунингдек, ўтган даврда иш берувчилар сони салмоқли даражада ортган бир шароитда мамлакатимиз иқтисодиётининг янада юксалишида муҳим аҳамият касб этишини таъкидладилар. Бугунги кунда тегишли соҳалар учун кадрлар тайёрлашга ва уларнинг малакасига қўйиладиган талаблар кучайиб бормоқда. Соҳанинг ҳуқуқий таъминоти ва уни тартибга солувчи ҳужжатларни ўз вақтида такомиллаштириш эса айниқса долзарбдир.
Сўзга чиққанлар қонунчилик ташаббуси субъектининг қонунда меҳнат муҳофазаси соҳасидаги “касбий хавф-хатар”, “меҳнат муҳофазаси аудити” каби алоҳида тушунчаларни аниқ белгилаш тўғрисидаги таклифи ўз вақтида ва тўғри билдирилган ташаббус экани, бу эса меҳнатни муҳофаза қилиш тизимини янада тўлиқ акс эттиришини айтиб ўтишди.
Бундан ташқари, қонуннинг янги таҳрирдаги лойиҳасини қабул қилишдан мақсад қонун нормаларини янги қабул қилинган қонунлар ва норматив-ҳуқуқий ҳужжатлар талабларига мувофиқлаштиришдан, ташкилотларда иш берувчининг ва ходимларнинг меҳнатни муҳофаза қилиш талабларини бажариш бўйича масъулиятини оширишдан, махсус ваколатли давлат органининг, давлат бошқаруви бошқа органларининг меҳнат шароитлари ва меҳнатни муҳофаза қилиш юзасидан тегишли назоратни таъминлаш борасидаги вазифаларини белгилашдан иборат эканлиги айтиб ўтилди.
Тадбир давомида қонун лойиҳасини маромига етказиш, уни ҳуқуқий жиҳатдан такомиллаштириш юзасидан иштирокчилар томонидан билдирилган фикр-мулоҳазалар қизғин муҳокама қилинди. Унинг якунида қонун лойиҳасининг муҳокамаси бўйича тегишли тавсиялари ишлаб чиқилди.