Янгиликлар

Коррупция – жиддий хавф

Сурхондарё вилоят адлия бошқармаси томонидан Жиноят ишлари бўйича вилоят суди билан ҳамкорлигида Марказий банк Сурхондарё вилоят бош бошқармасида “Корупция жинояти ва унинг ҳуқуқий оқибатлари” мавзусида давра суҳбати ташкил этилди.

Давра суҳбатида қайд этилганидек, мамлакатимизнинг тараққиётига ва фаровон турмушимизга жиддий хавф солувчи иллатлардан бири коррупция эканлиги, зотан, мансабдор шахсларнинг жиноятчилар билан тил бириктириб олган даромадларини ошкоралаштириш билан боғлиқ қилмишлари жамиятда жиноятчиликнинг кескин ортишига сабаб бўлиши мумкинлиги бундай хавфли қилмиш жиноий бизнесни рағбатлантириб, давлатнинг иқтисодий салоҳиятига путур етказади, мамлакатдаги ижтимоий-сиёсий вазиятни издан чиқаради. Қолаверса, ҳар қандай жиноят учун жазонинг муқаррарлиги принципига риоя этилмаслиги оқибатида қонун устуворлиги таъминланмайди.

Коррупциянинг ижтимоий хавфлилиги шундаки, айрим мансабдор шахслар мулкий манфаат кўриш илинжида ўзларининг ғайриқонуний харакатлари билан жиноий ташкилотларга кўмаклашадилар. Аниқроқ айтганда, коррупция жиноий гуруҳ аъзоларига пул ажратиш, уюшма аъзоларига хоналар ажратиб бериш ёки уларни транспорт билан таъминлаш, ҳокимият ва бошқарув идораларининг ходимларини сотиб олиш ва коррупцияга жалб қилишга йўналтирилган фаол ҳаракат ёки ҳаракатсизлик, ҳуқуқий ва бошқа маслаҳатлар бериш, жиноий йўл билан топилган моддий бойликларни қонунийлаштириш ва шунга ўхшаш харакатлардан иборат эканлиги такидланди.

Коррупция билан шуғулланиб, жиноий уюшманинг мавжудлиги ва унинг фаолиятини таъминлашга қаратилган харакатларни содир этган мансабдор шахс Жиноят кодексининг 242-моддасининг 1-қисми билан жавобгарликка тортилади.

Жиноят кодексининг айрим моддалари коррупция билан боғлиқ баъзи ҳаракатлар учун жавобгарликни белгилайди. Шу сабабли коррупция билан шуғулланган мансабдор шахснинг ҳаракатлари Жиноят кодексининг айнан шу ҳаракатни кўзда тутувчи моддалари билан квалификация қилинади.

Шу ўринда жиноий уюшма тушунчасига алоҳида тўхталиш жоиз. Жиноий уюшма ташкил этиш ва унга раҳбарлик қилиш деганда мос келадиган номзодларни топиш ва уларни фаолиятга жалб этиш, уюшган гуруҳлар ва уюшма аъзолари ўртасида вазифаларни тақсимлаш, умумий жиноий режани ёки алоҳида ҳужум режасини тузиш ва бошқа ҳаракатлар тушунилади .

Коррупция билан шуғулланиб, ушбу гуруҳлар фаолиятига шароит яратиб берувчилар асосан мансабдор шахслардир. Улар ўзининг ваколатидан фойдаланиб, жиноий ҳаракатларни содир этади ва жиноятчиликнинг ривожланишига шароит яратиб беради.

Хулоса қилиб айтганда, коррупцияга қарши курашиш ва унинг олдини олиш жамиятда қонун устуворлигини таъминлаш, уюшган жиноятчиликка барҳам бериш ва халқимизнинг хавфсизлигини таъминлашга хизмат қилиши ҳақида ҳуқуқий тушунчалар берилди.

Тадбир сўнгида давра суҳбати тингловчилари томонидан берилган саволларга маърузачилар батафсил жавоб бердилар.