Янгиликлар

Норма ижодкорлиги ва ҳуқуқни қўллаш амалиёти

Қонунлар ижроси, ҳуқуқни қўллаш амалиётининг самарадорлиги давлат ҳокимияти ва бошқаруви органлари томонидан тайёрланадиган норматив-ҳуқуқий ҳужжатлар лойиҳаларининг сифати билан бевосита боғлиқ. Бунда ҳар бир ташкилотнинг юридик хизмати зиммасига катта масъулият юкланади.

Шу боис ҳам юртимизда юридик хизмат сифатини оширишга алоҳида эътибор қаратилмоқда. Шу йўналишдаги норматив-ҳуқуқий база тўлиқ янгиланиб, юридик хизмат мақомини белгилашга қаратилган ҳукумат қарорлари қабул қилинган. Адлия органлари томонидан мазкур соҳага услубий ёрдам кўрсатиш, уни ривожлантириш мақсадида ўнлаб идоравий норматив-ҳуқуқий ҳужжатлар ишлаб чиқилиши билан бирга, амалий тадбирлар мунтазам ташкил этилмоқда.

Ўзбекистон Республикаси Президентининг 2011 йил 23 августдаги қарори билан тасдиқланган Адлия вазирлиги тўғрисидаги низомда давлат бошқаруви органлари, маҳаллий давлат ҳокимияти органларининг норма ижодкорлиги масалалари бўйича фаолиятини мувофиқлаштириши ва уларга услубий раҳбарликни амалга ошириш Адлия вазирлигининг муҳим вазифаларидан бири этиб белгиланган.

Ўзбекистон Республикасида давлат ҳокимияти ва бошқаруви органларининг норма ижодкорлиги фаолияти соҳасидаги ислоҳотлар тобора чуқурлашиб борар экан, жамиятнинг замонавий талаб ва эҳтиёжларига мос келувчи ягона қонунчилик тизимининг шаклланиши ва ривожланиши талаб этилади. Маҳаллий давлат ҳокимияти органларининг норматив-ҳуқуқий хусусиятга эга бўлган қарорлари ҳам қонунчилик тизимида ўзига хос ўрин тутади.

Таъкидланганидек, маҳаллий давлат ҳокимияти органларининг норма ижодкорлиги соҳасидаги фаолиятини янада такомиллаштиришни даврнинг ўзи тақозо этмоқда. Бинобарин, маҳаллий давлат ҳокимияти органлари давлатнинг қуйи тизими ҳисобланиб, фуқаролар билан тўғридан-тўғри муносабатларга киришади, уларнинг ҳаёт тарзи ва тартибга солиниши лозим бўлган муносабатлари ҳақида кўпроқ маълумотга эга ҳисобланади. Бу эса, маҳаллий давлат ҳокимияти органлари томонидан тайёрланадиган норматив-ҳуқуқий ҳужжатларни ҳар томонлама мукаммал, юридик техника жиҳатдан тўғри расмийлаштирилишини тақозо этади.

Шу боис, “Давлат органларида юридик хизмат фаолиятини янада такомиллаштириш ва ривожлантиришнинг долзарб масалалари – мавжуд муаммолар ва уларни ҳал этиш йўллари” мавзусидаги анжуман Ўзбекистон Республикаси адлия вазирининг 2015 йил 25 декабрдаги буйруғи билан тасдиқланган “Норматив-ҳукукий ҳужжатлар лойиҳаларининг коррупцияга қарши экспертизасини ўтказиш услубиётини тасдиклаш тўғрисида”ги ҳужжат мазмун-моҳиятини тушунтиришга бағишланди.

Мазкур семинар машғулоти Ўзбекистон Республикаси Адлия вазирлиги, Сурхондарё вилоят адлия бошқармаси масъул ходимлари ҳамда вилоятдаги барча давлат ва хўжалик бошқаруви органлари, шунингдек маҳаллий давлат ҳокимияти органларининг юридик хизмати ходимлари иштирокида эркин мулоқот тарзида ташкил этилди.

Семинарда Адлия вазирлигининг масъул ходимлари томонидан коррупцияга қарши экспертизанинг вазифалари, ушбу қарши экспертизани ўтказишнинг асосий тамойиллари ҳақида батафсил маълумотлар берилди.

Шунингдек, ҳуқуқни қўлловчиларга асоссиз равишда кўриб чиқишнинг кенг доирасини ёки умумий қоидалардан чиқувчи истисноларни асоссиз қўллаш имкониятини белгиловчи ва ҳуқуқни тартибга солишдаги бўшлиқлар билан боғлиқ бўлган коррупциявий омиллар ҳақида ҳам тадбир қатнашчиларига тушунчалар берилди.