Янгиликлар
Тадбиркорлар учун қулайликлар
Давлатимиз мустақиликка эришгандан сўнг бир қанча соҳаларда кенг кўламли ислоҳотлар амалга оширилди, ана шу соҳалар қатори тадбиркорлик фаолиятига ҳам алоҳида эътибор қаратилди.
Тадбиркорлар учун қулай шарт – шароитлар яратиш, уларнинг эркин фаолият юритиши учун мавжуд тўсиқларни олиб ташлашга оид бир қанча норматив – ҳуқуқий ҳужжатлар қабул қилинди.
Ўзбекистон Республикаси Президентининг 2015 йил 15 майдаги “Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги фармони ва 2015 йил 28 сентябрдаги “Тадбиркорлик субъектларига “Ягона дарча” тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида”ги қарори ҳамда Ўзбекистон Республикаси Вазирлар Маҳамасининг 2015 йилнинг 14 декабрдаги “Ўзбекистон Республикаси Президентининг “Тадбиркорлик субъектларига “Ягона дарча” тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида” 2015 йил 28 сентбябрдаги қарорини амалга ошириш чора-тадбирлари ҳақида”ги қарорлари шулар жумласидандир.
Сурхондарё вилоят адлия бошқармаси томонидан тадбиркорлик субъектларига юқоридаги норматив-ҳуқуқий ҳужжатларнинг мазмун-моҳиятини тушунтириш, давлатимиз томонидан уларга берилаётган имкониятларни етказиш мақсадида кенг кўламли тарғибот ва ташвиқот ишлари йўлга қўйилиб, вилоятнинг барча ҳудудларида давра суҳбатлари, учрашув ва семинарлар ташкил этилмоқда.
Ана шундай тадбирлардан бири, Сурхондарё вилоят адлия бошқармаси томонидан тегишли идоралар билан ҳамкорликда Қумқўрғон ва Денов туман ҳокимликларининг мажлислар залида тегишли идора ва ташкилотлар ҳамда тадбиркорлик субъектлари иштирокида бўлиб ўтди.
Тадбирда сўзга чиққанлар, Юртбошимизнинг ушбу фармон ва қарорлари асосида мамлакатимиз тадбиркорларига яратилган қўшимча кафолатлар ва шарт – шароитлар ҳақида тўхталишди.
Мазкур фармон ва қарорлар мамлакатимиз иқтисодиётида хусусий мулкнинг ўрни ва ролини тубдан ошириш, хусусий мулк ва хусусий тадбиркорликни ривожлантириш йўлидаги тўсиқ ва чекловларни бартараф этиш, иқтисодиётда давлат иштирокини камайтириш, ялпи ички маҳсулотда хусусий мулк, жумладан чет эл капитали иштирокидаги улушини изчил ошириш мақсадида қабул қилинганлиги, фармон ва қарорлар билан хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш мақсадида 4 та асосий йўналиш бўйича амалга ошириладиган 33 та аниқ чора-тадбирларни кўзда тутувчи комплекс Дастур тасдиқланганлиги ва бошқа мутасадди идораларга юклатилган вазифалар, тадбиркорлик субъектларига яратилган қўшимча қулайлик ва имтиёзлар ҳақида аниқ тушунчалар беришди.
Шунингдек, ушбу тадбирда семинар иштирокчиларига “Ягона дарча” марказларининг фаолияти, уларнинг асосий вазифа ва функциялари ҳамда марказлар орқали кўрсатиладиган давлат хизматларининг тартиб-таомиллари ва Ўзбекистон Республикаси Вазирлар Маҳкамасининг 2015 йилнинг 14 декабрдаги “Ўзбекистон Республикаси Президентининг “Тадбиркорлик субъектларига “Ягона дарча” тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида” 2015 йил 28 сентбярдаги қарорини амалга ошириш чора-тадбирлари ҳақида”ги қарори билан тасдиқланган 2 та, яъни “Тадбиркорлик субъектларига “Ягона дарча” тамойили бўйича давлат хизматлари кўрсатиш ягона марказлари фаолиятини ташкил этиш тартиби тўғрисида”ги ва “Тадбиркорлик субъектларига “Ягона дарча” тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисида”ги Низомлар тўғрисида батафсил маълумотлар берилди.
Тадбир қизғин музокаралар асосида ўтказилиб, иштирокчилар ўзларини қизиқтирган барча саволларга батафсил жавоблар олишди.